හිටපු ලෝක විවාහක රූරැජිණි රෝසි සේනානයක මහත්මිය පසුගිය වසරේ ශ්‍රී ලංකා විවාහක රූරැජිණි කිරුළ දිනූ පුෂ්පිකාද සිල්වා මහත්මිය වෙත රුපියල් මිලියන 500ක් වන්දි ඉල්ලා එන්තරවාසියක් යැවීමට කටයුතු කර ඇත.
පසුගියදා ඇමරිකාවේ පැවැති 2021 ලෝක රූ රැජින අවසන් තරගාවලියේ ශ්‍රී ලංකාව නියෝජනය කරන්නට පුෂ්පිකා ද සිල්වා මහත්මිය ගොස් තිබුණි.
එහිදී අවසන් හය දෙනා අතරට තේරුණ පුෂ්පිකා කියා සිටියේ තමන් එම තරගයේදී 4 වැනියා වූ බවයි. ඇය 4 වැනියා යයි කියා සිටීම පසුව සමාජ මාධ්‍ය තුළ සමච්චලයටද භාජනය විය.
ශ්‍රී ලංකාවට පැමිණි පසු පුෂ්පිකා වීඩියෝ සාක්ෂියකින් කියා සිටියේ තමාට 4 වැනියා යයි කියන්නට උපදෙස් සැපයූයේ එම තරගාවලියට ලංකාවෙන් ඇමරිකාවට ගිය සහායක කණ්ඩායමේ සිටි රෝසි සේනානායක මහත්මිය බවයි.
ඉන් පසුව ඇය රෝසි සේනානායක මහත්මියට බරපතල චෝදනා රැසක් සිදු කරමින් ‘ටෘත් විත් චමුදිත‘ යූටියුබ් නාලිකාවේ මිනිත්තු 46 ක සම්මුඛ සාකච්ඡාවකට එක්වූවාය.
එම සම්මුඛ සාකච්ඡාවේදී ඇය පෙන්වා දුන්නේ තමන් අවසන් තරගයේදී ජයග්‍රාහිකාව ලෙස සටහන්වූ ලකුණු සටහන පවා දැකතිබූ නමුත් අවසන් මොහොතේ තමන්ගේ ජයග්‍රහණය වෙනස් වූයේ රෝසි සේනානායක මහත්මිය සිදු කළ කුමන්ත්‍රණයක් නිසා බවයි.
රෝසි මහත්මිය තරගයේ ප්‍රධාන සංවිධායකවරියක සමග දිවා භෝජනයකට එක්වූ බවත් එයින් අනතුරුව පැවති තරග වටයේදී තමන්ගේ ස්ථානය පහත වැටී ඇති බව විස්මයෙන් දැනගත් බවත්ය.
එබැවින් ‘සදාකාලිකව එකම විවාහක රූරැජිණ කිරුළ‘ තමන් සතු කරන්නට පවතින රෝසිගේ ආත්මාර්ථය නිසා තමන්ට රැගෙන එන්නට ඉඩ තිබූ මෙවර කිරුළ ශ්‍රී ලංකාවට අහිමිව ගිය බව පුෂ්පිකා දන්වා සිටියාය.
තමන්ගේ වියදමින් රෝසි මහත්මිය ඇමරිකාවට ගිය බවත් එසේ ගොස් තමන්ගේ ජයග්‍රහණය පවා වැළකූ බවත් ඇය චෝදනා කළාය.
මෙම සම්මුඛ සාකච්ඡාවේදී රෝසි සේනනායක මහත්මිය හා චන්දිමාල් ජයසිංහ සංවිධායකවරයා ඉලක්ක කර පුෂ්පිකා ද සිල්වා මහත්මිය තවත් බරපතල චෝදනා රැසක් ගොනු කර තිබූ අතර ‘නාකි රූරැජිණ‘ වැනි අපහාසාත්මක යෙදුම්ද භාවිත කරන්නීය.
මින් ඉහත ලෝකය පුරා ආන්දෝලනයක් ඇති කරමින් කැරොලයින් ජූරි විසින් පුෂ්පිකාට ලැබුණ කිරුළ ගළවනු ලැබූ අවස්ථාවේ පුෂ්පිකා වෙනුවෙන් සටන් කරන්නට හා කැරොලයින්ගේ ක්‍රියාව හෙළාදකින්නට ක්‍රියා කර තිබූ රෝසි සේනානායක මහත්මිය ඉලක්කකර අභූත චෝදනා නැගීම නිසා රෝසි ඇගේ නීතීඥයින් මාර්ගයෙන් රුපියල් මිලියන 500ක් වන්දි ඉල්ලා එන්තරවාසියක් යැවීමට කටයුතු කර ඇත. තමන් කර ඇති අසත්‍ය ප්‍රකාශ නිවැරදි කර සමාව ඉල්ලා සිටින ලෙසත් එසේ නැතිනම් කීර්ති නාමය පළුදු කිරීමේ අලාභ වන්දි මුදල ගෙවන ලෙසත් එමගින් ඉල්ලා ඇත. මෙයට පුෂ්පිකා තවම ප්‍රතිචාර දක්වා නැත.